Полицијата вечерва открила нов случај на криумчарење мигранти близу македонско-грчката граница, јавува „360 степени“.
Станува збор за група од повеќе од 60 мигранти пронајдени во камион со скопски регистарски таблички близу селото Миравци. За настанот е известено обвинителството за гонење организиран криминал, кое е надлежно за овие случаи.
Неофицијално, возачот на камионот е од Скопје и против него утре ќе биде поднесена кривична пријава.
Во последните недели зачестија обидите за криумчарење мигранти во земјава, особено откако Турција ја крена рампата за нивен трансфер кон Грција и Бугарија. Сепак, најверојатно станува збор за мигранти кои од порано биле на територијата на Грција, а сега полесно се движат на север затоа што грчките полициски сили се концентрирани на граничната линија со Турција.
