Двајца од четворицата приведени во синоќешната акција на МВР во Крушопек, каде полицијата заплени еден килограм кокаин, се ослободени, а за двајца е отворена истрага.
-Зврши распитот на лицата што вчера вечер беа лишени од слобода во акцијата во с. Крушопек, Општина Сарај. Надлежен јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против две лица за кои постои основано сомнение дека сториле кривично дело Неовластено производство и пуштање во промет на наркотични дроги, психотропни супстанции и прекурсори предвидено и казниво по член 215 од Кривичниот законик- наведуваат во соопштение од ОЈО Скопје.
Оттаму соопштуваат дека, врз основа на прибраните докази и изјавите на лицата кои беа лишени од слобода, надлежниот обвинител до Судијата на претходна постапка при Основниот кривичен суд – Скопје вечерва достави Предлог за определување на мерка притвор за сопственикот на фирмата увозник на овошјето, додека за второ осомниченото лице предложи мерки за обезбедување присуство. Останатите две лица се ослободени, а осомничените вечерва ќе бидат изведени пред Судија на претходна постапка.
Прочитајте и… Правдата ќе мора да ги стигне и најмоќните
По Наредба на јавниот обвинител товарното возило во кое е откриена наркотичната дрога и целата пратка со овошје се запленети и предадени во Агенцијата за одземен имот, се вели во соопштението на Обвинителството.
