Секогаш во средиштето на збиднувањата...

Почнува бесплатната вакцинација против сезонскиот грип

Бесплатната вакцинација против сезонскиот грип почнува од денеска.

Од Министерството за здравство вчера информираа дека оваа сезона се набавени вкупно 28 илјади вакцини, кои се бесплатни и наменети за лица над 65 години, лица со хронични заболувања, деца на возраст од 6 месеци до 5 години, бремени жени, како и здравствени работници.

Центрите за јавно здравје набавија 21.000 комерцијални вакцини, кои веќе се достапни за граѓаните од понеделникот.

Покрај десетте центри за јавно здравје, во вакцинацијата годинава вклучени се и трите поликлиники: Букурешт, Чаир и Ѓорче Петров при Здравствениот дом во Скопје.

Во центрите за јавно здравје вакцинацијата ќе се одвива во две смени, а бесплатната вакцинација во трите поликлиники ќе се одвива во периодот од 14 до 18 часот.

Од Министерството за здравство информираат дека станува збор за вакцини од реномирани странски производители, меѓу кои 27 илјади вакцини се од Mylon Abot, а илјада вакцини од Sanofi.

Како и во изминатите сезони, пикот на активноста на вирусот на сезонски грип се очекува во февруари, а вакцинацијата во овој период, ноември и декември, ќе обезбеди најголема заштита во периодот кога се очекува активноста на вирусот да биде највисока.

Во тренд…