Секогаш во средиштето на збиднувањата...

Концерт на тенорот Благој Нацоски во чест на италијанскиот композитор Руџеро Леонкавало

Утре во 20 часот во Малата сала при националната Филхармонија, италијанската aмбасада организира оперски концерт во чест на италијанскиот композитор Руџеро Леонкавало, со македонскиот тенор Благој Нацоски, а по повод одбележувањето на 60 години од воведувањето на наставата на италијанскиот јазик и култура при Универзитетот „Св. Кирил и Методиј“ во Скопје.

Настанот е завршниот дел на меѓународната конференција „Италијанистиката во третиот милениум: Новите предизвици во јазичните, книжевните и културолошките истражувања“, организирана од Катедрата за италијански јазик и книжевност при Филолошкиот факултет „Блаже Конески“, со поддршка на Ректоратот, на Факултетот и на италијанската амбасада.

Тема на концертот ќе бидат оперските дела на Руџеро Леонкавало (1857-1919), еден од најважните претставници на мелодраматичниот варизам, како комеморација на стогодишнината од смртта на наполитанскиот музичар. Иако е познат најмногу по неговото дело I pagliacci, Леонкавало е автор и на многу други дела, меѓу кои и La bohème и Zazà. Програмата опфаќа и изведби на дела од автори современици на Леонкавало, како на пример Пјетро Маскањи и Франческо Паоло Тости.

Познатиот македонски тенор Благој Нацоски веќе долги години е во Италија, настапувал во престижни меѓународни театри, како La Scala во Милано, La Fenice во Венеција и New York City Opera. Во 2008 година од страна на Владата во Скопје му е доделена почесната титула амбасадор на македонската култура, а во неговата речиси дваесетгодишна кариера може да се пофали со бројни соработки со важни диригенти. Во оваа пригода ќе го придружуваат Дино Имери на пијано и сопранот Хелена Суша. За време на концертот ќе има и говори за животот и делото на Леонкавало, на македонски и на италијански јазик.