Во текот на минатиот месец царинските службеници откриле обид за шверцување марихуана, амфетамин и кокаин.
Како што информираат од Царинската управа, на граничниот премин Богародица на 10 август во вечерните часови за влез во државата се пријавил германски автомобил, управуван од турски државјанин, со кој патувале уште двајца сопатници.
„При контрола на возилото во ранец меѓу предметите за лична хигиена била пронајдена кеса со непозната прашеста материја, а при претрес на возачот во џебот од неговата јакна била пронајдена пластична вакуум-кеса со непозната тревлива материја, а во пакет од влажни марамчиња била пронајдена бела прашеста материја обвиена со жолта кеса“, се наведува во извешатајот.
По извршена проверка со тестери за дрога и мерење со дигитална вага, било утврдено дека се работи за марихуана со тежина од 24 грама, кокаин во количина од 0,5 грама и амфетамин со маса од 17 грама.
Дополнително, бил извршен детален преглед на возилото со помош на полициско куче, но не биле откриени други неправилности.
