Велешкиот суд одреди мерка притвор во траење од 30 дена за две лица за кои се води истражна постапка за кривично дело „неовластено производство и пуштање во промет наркотични дроги, психотропни супстанции и прекурсори“.
Како што информираат од Јавното обвинителство, двајцата осомничени за да пренесат марихуана во количина од 9.855 грама, искористиле претходно договорено патување на првоосомничениот во Турција каде со камион требало да се однесе дрвена граѓа.
Ноќта пред патувањето, закажано на 22 јули месецов, второосомничениот ја донел дрогата до камионот кај село Смоквица каде се сретнал со првоосомничениот кој го управувал истиот. Дрогата била спакувана во 20 полиетиленски пакувања со марихуана сместени во две торби и еден куфер.
Второосомничениот влегол во камионот кој го управувал првоосомничениот и ја распоредил дрогата на повеќе места во возилото.
Кога осомничените во текот на ноќта со камионот пристигнале на граничниот премин Стар Дојран, при излез од државата била извршена контрола од службени лица и дрогата била пронајдена.
Ценејќи дека постои опасност од бегство на осомничените како и можност да го повторат кривичното дело, јавниот обвинител од велешкото основно јавно обвинителство доставил предлог за определување на мерка притвор, кој Основниот суд во Велес го прифатил.
