Хип хоп артистот Тони Зен, вчеравечер, во МКЦ го промовира својот шести по ред албум со наслов „Од изворот на изборот“. Пред повеќе стотици гости, најголем дел негови пријатели и препознатливи музички имиња од домашната сцена, Тони Петковски нескриено ја искажа радоста по повод излегувањето на неговиот најнов соло албум.
„Сите осум песни се инспирирани од моите лични искуства изминативе години. Овој албум се слуша со срце. Не случајно е акустичен, мирен и сниман во 432 Hz, со цел да се задржи природната фреквенција. Музиката на албумот е посветена на вистината, љубовта и просветлението“, рече Тони Зен.
Албумот е независно издаден со поддршка на „СТ продукција“ како дистрибуција и изработка на ЦД и обвивка. Сниман е во студиото Knobs Keys ‘n Stuff заедно со Бојан Филиповски Gloomie, а миксот и мастерингот го изработи Мите Димовски во студиото „Тралала“.
Албумот има осум песни. Текстовите ги напиша Тони Зен, а музиката ја создаде заедно со Кирил Бабамов (гитара) и Ратко Даутовски (перкусии). Mузичарите што дадоа свој придонес на албумот се Мартин Јосифовски на бас-гитара, саксофон и флејта – Борислав Веселинов, клавијатури – Борче Кузмановски и Бојан Филиповски, Александар Пешевски-Сале – усна хармоника, и придружни вокали – Весна Малинова-Бабамова и Бојан Филиповски.
Од денеска албумот е во продажба во музичките продавници.
