Со поддршка на Општина Карпош, во организација на Амбасадата на САД во Скопје и „Американските катчиња“ во Северна Македонија, на 31.05.2019 (петок), ќе се одржи реномираниот меѓународен настан, насловен како „Skopje Mini Maker Faire“. Годинава, глобалното движење на иноватори, креативци, уметници, научници и љубители на технологијата, ќе ги презентираат своите креативни иновации во рамки на ВИП арената на спортската сала „Борис Трајковски“ (источен паркинг) до 10:00 до 19:00 часот.
Според агендата, ќе се одржат повеќе креативни и практични работилници, како и неколку предавања од значајни и успешни експерти од полето на технологијата, науката и уметностите.
„Mini Maker Faire“ за прв пат се одржа во Сан Матео, Калифорнија (САД), а во Њу Јорк се одржа „World Maker Faire“, кој за шест години достигна бројка од 900 активни учесници (Makers) и 95.000 посетители. Околу 40 „Maker Faire“ манифестации се одржуваат во повеќе светски метрополи какви што се: Берлин, Париз, Рим, Токио и други. Приближно 170 независни „Mini Maker Faires“, предводени од „Maker“ заедниците се одржуваат во САД и во 43 други држави ширум светот.
