Град Скопје информира дека жичарницата „Милениумски крст“ од денеска ќе работи еден час подолго од досега, односно ќе работи до 18 часот, согласно утврдениот возен ред.
Работното време ќе биде од 10 до 18 часот, при што последното возење од доле нагоре е во 17.30 часот, односно во 17.45 часот од горе надоле.
Жичарницата на Средно Водно работи секој ден освен во понеделник и секој последен вторник во месецот, кога се врши редовен технички преглед на објектот.
Оттаму велат дека Жичарницата, со која стопанисува ЈСП Скопје, со успех ја завршила 2018 година, дека е утврден зголемен број на продадени билети и приход во споредба со 2017 година.
Како што се наведува, вкупно биле продадени 166.791 билети, при што е остварен приход од 13.488.230 денари, додека во 2017 година се продале 160.699 билети, а бил остварен приход од 13.287.100 денари.
Во изминатава година најголем пораст е забележан кај продажбата на групните билети за возрасни, биле продадени 7.420 билети, што е за 1.168 билети повеќе во споредба со 2017 година. Забележан е пораст и на продажбата на билети за враќање и месечни билети.
