Секоја израелска воена ескалација против Палестинците најверојатно ќе доведе до убиство на некои заложници, изјави вчера портпаролот на Хамас Абу Обеида, додавајќи дека израелските закани за војна и блокада нема да обезбедат ослободување на заложниците.

Обеида предупреди дека секоја израелска воена ескалација против Хамас во Газа најверојатно ќе резултира со убиство на некои заложници, објави „Тајмс оф Израел“.

Тој додаде дека израелските закани за војна и блокада нема да обезбедат ослободување на заложниците и тврди дека Хамас останува посветен на придржувањето до договорот за прекин на огнот со Израел, чија прва фаза неодамна беше завршена.

Во Појасот Газа, Хамас сè уште држи 59 заложници по завршувањето на првата фаза од прекинот на огнот, од кои најмалку 35 се мртви, како што потврдија израелските одбранбени сили (ИДФ).

Кабинетот на израелскиот премиер Бенјамин Нетанјаху соопшти дека на САД им го пренел ставот на Израел во врска со директните преговори со Хамас.

Откако Белата куќа потврди дека администрацијата на американскиот претседател Доналд Трамп одржала директни разговори со Хамас, канцеларијата на Нетанјаху соопшти дека Израел му пренел на Вашингтон „како се чувствува“ за тие контакти, но не наведе детали.

Белата куќа претходно потврди дека води директни разговори со Хамас и соопшти дека за овие преговори бил консултиран Израел.

Повикувајќи се на два неименувани извори, американскиот портал Аксиос претходно објави дека пратеникот на Трамп за прашања за заложниците, Адам Белер води директни преговори со Хамас во врска со ослободувањето на американските заложници држени во Газа, како и за можноста за постигнување поширок договор за прекин на војната./Извор:Makfax