Агенцијата за аудио и аудиовизуелните медиумски услуги и Агенцијата за храна и ветеринарство денеска потпишаа меморандум за соработка во врска со рекламирање, телешопинг, пласирање производи и спонзорство за храна и додатоци во исхраната во програмите на радијата и телевизиите, особено во поглед на здравствените и нутритивните тврдења, за тврдењата за намалување на ризикот од болест и за измамите поврзани со храната.
Целта на потпишувањето на меморандумот е да се заштитат здравјето и интересите на потрошувачите и граѓаните да имаат можност да направат личен и правилен избор врз основа на вистинити и чесни информации. Имајќи ја предвид ранливоста на најмладите, посебен фокус ќе биде ставен на аудио и аудиовизуелните комерцијални комуникации, што се составен дел или ги придружуваат емисиите за деца, а кои содржат масти, заситени масни киселини, сол/натриум и шеќери, чие прекумерно внесување во вкупната исхрана не е препорачливо.
„Размената на информации меѓу двете агенции ќе биде во функција на доследно почитување на законски пропишаните правила и стандарди за комерцијални комуникации, кои се однесуваат на храната и додатоците во исхраната“, посочи директорот на АВМУ, Зоран Трајчевски.
„Преку договорената соработка, во рамките на националната регулатива, која се однесува на оваа област, денес, заедно со АВМУ пред потрошувачите, институциите и бизнис-заедницата ги поставивме основите за одговор на современите барања за рекламирање на оваа категорија производи, што ќе биде гаранција дека на пазарот се нудат максимално безбедна храна и додатоци во исхраната, а потрошувачите не се доведуваат во заблуда и измама од страна на операторите“, истакна Николче Бабовски, директор на Агенција за храна и ветеринарство.
НАЈЧИТАНО НА ИНТЕРНЕТ...
