Навремените и ефикасни економски мерки што ги презедоа Владата предводена од СДСМ и премиерот Зоран Заев дадоа резултати во ублажување на последиците од корона-кризата врз економијата. Ова го истакна портпаролот и пратеник на СДСМ, Костадин Костадинов, на прес-конференција.
„И покрај тоа што 2020 беше година на економска и здравствена криза, во стопанството се слеале 397,4 милиони евра по основ на поврат на ДДВ кон фирмите. За цела 2020 година извршен е поврат на речиси 34 % од наплатениот бруто-данок на додадена вредност. За споредба, во 2019 година извршен е поврат од 32 %, во 2018 од 31 %, во 2017 од 28 %, а во 2016 година 26 %. Уште еден охрабрувачки податок е растот на индустриското производство во декември 2020 година. Според официјалните податоци, индустриското производство во декември е зголемено 2,5 отсто и е прв месец од почетокот на пандемијата во кој индустријата бележи раст“, рече Костадинов.
Како што посочи, СДСМ ќе продолжи со сериозни и ефикасни економски политики, што ќе овозможат рестарт на економијата и враќање на стапките на раст пред корона-кризата.
