Борбата против криминалот и корупцијата е врвен приоритет за СДСМ, а со стратешката рамка „Акција 21“ на Владата оваа борба станува посилна и поефикасна со зајакнување на сите капацитети кои се борат против високата корупција, наведува владејачкиот СДСМ преку соопштение.
„Ова е време на ред, правда и дисциплина. Секој кој ќе го прекрши законот, ќе мора да се соочи со одговорност, без разлика дали е функционер или не. Време е за поставување ред во институциите.
Во првите шест месеци од годинава, во соработка со УСАИД ќе се спроведе тест за проценка на интегритетот на членовите на Владата и нивните советници и надворешни соработници, со цел подобро воочување на евентуални слабости во поединечните сектори со што корупцијата ќе се превенира навремено.
Почнува и реализација на проектот за интероперабилност меѓу антикорупциските институции кои одговараат пред Владата, со што се овозможува безбедна и ефикасна размена на податоци по електронски пат за предмети поврзани со корупција.
На овој начин се очекуваат брзи и ефикасни резултати во решавањето на случаите за кои постои сомнеж за корупција, веќе никој нема да смее да затајува, забавува и закочува случаи во кои постојат сомнежи за корупција.
Следува зајакнување на правниот систем преку доекипирање и дигитализација на истражните центри во Јавното обвинителство, како и електронски систем за инспекција.
Граѓаните треба да ја препознаваат корупцијата и не треба да се плашат, ниту да се двоумат да ја пријават. Се воведува повикувачки број преку кој сите лица и физички и правните ќе можат да пријават ненавремено постапување на надлежните институции по однос на нивните поднесени барања.
СДСМ како одговорна партија ги носи европските стандарди дома и се води по принципот нулта толеранција кон корупцијата.
Така се гради праведно и правично општество, така се гради држава што оди напред“, пишува СДСМ во соопштението.
НАЈЧИТАНО НА ИНТЕРНЕТ...
