Претседателот Стево Пендаровски имаше средба со министерката за култура, Ирена Стефоска.
„На средбата министерката Стефоска го информираше претседателот Пендаровски за тековните активности и приоритети на Министерството, за актуелната состојба во јавните установи од културата и потребата од институционални реформи со цел доследно спроведување на концептот на отворени институции. Во таа насока, беа разгледани и можностите за реализација на нови иницијативи во културата и уметностa, со коишто ќе се воспостави мост помеѓу културното наследство и современите културни практики“, соопштија од кабинетот на Пендаровски.
Соговорниците размениле мислења и за можните начини да се помогне на сите културни работници во справување со последниците предизвикани од пандемијата на Ковид-19.
„Претседателот Пендаровски од своја страна истакна дека од голема важност, и покрај сите предизвици, е да се одржи културната интеграција и духот на творештво и креативност, преку прилагодување на културните манифестации согласно новите правила кои ги наметна пандемијата. Претседателот Пендаровски изрази поддршка за создавањето независен културен простор и негово јакнење, преку спроведување развојни културни политики, како и поддршка во унапредување на културната димпломатија, a со цел афирмација на културното наследство на нашата држава во регионот и пошироко“, се наведува во соопштението.
НАЈЧИТАНО НА ИНТЕРНЕТ...
