Во Министерството за земјоделство, шумарство и водостопанство денеска беа доделени уверенија на 81 шумски полицаец и еден заменик-командир, по завршувањето на шестмесечната обука.
Министерот Борче Серафимовски посочи дека зајакнувањето на Шумската полиција се случува на почетокот на грејната сезона, кога притисокот врз шумските ресурси се зголемува. Според него, новите припадници ќе овозможат повеќе теренски контроли.
Посебен приоритет ќе биде спречувањето на бесправната сеча, како и откривањето незаконски превоз и продажба на огревно дрво. Министерот побара полицајците да постапуваат професионално, врз основа на докази и во рамките на законските овластувања.


