Судската постапка за пожарот во дискотеката „Пулс“ во Кочани продолжува денеска со изведување докази предложени од одбраната. Во трагедијата животот го загубија 63 лица, а повеќе од 200 беа повредени. Одбраната најавила сослушување на вкупно 240 сведоци, што укажува на обемна доказна постапка во наредниот период.
На претходното рочиште се отворија несогласувања околу градежната документација и вештачењата за објектот. Обвинителството изнесе забелешки за методологијата на еден од вештаците, додека одбраната постави прашања за документацијата од 2012 година.
Судењето се одржува во судницата во затворот „Идризово“, а обвинението го застапува тим од 15 обвинители. Родителите и семејствата на жртвите продолжуваат да го следат процесот, очекувајќи судот да ја утврди индивидуалната одговорност врз основа на изведените докази.
