Сообраќајот на државните патишта во Македонија на 10 ноември се одвива непречено, но по претежно влажни коловози, информира Автомото сојузот на Македонија во дневниот извештај од 12:10 часот. Интензитетот на сообраќај надвор од градските средини е умерен, а на граничните премини од македонска страна не се пријавени подолги задржувања.
АМСМ препорачува внимателно возење на патиштата низ котлините, речните долини и клисурите, каде што постои ризик од појава на одрони. Посебна претпазливост е потребна на правците Катланово – Велес, Маврово – Дебар – Струга, Виница – Берово и Кочани – Делчево.
На патот Кичево – Охрид продолжуваат градежните активности на повеќе делници, поради што сообраќајот се одвива со девијации. Бидејќи состојбата на патиштата може да се промени, возачите што тргнуваат на пат во вечерните часови треба да го проверат најновото известување.
