Српската полиција привела лице осомничено за фрлање експлозивни направи кон зградата на телевизијата „Информер“ во Белград. По налог на Второто основно јавно обвинителство, на осомничениот му било определено задржување до 48 часа.
Според информациите што ги објавила телевизијата, кон објектот биле фрлени две направи за кои постои сомневање дека станува збор за силни пиротехнички средства. Една од експлозиите се случила во близина на снимател, кој почувствувал здравствени проблеми и бил пренесен во Ургентниот центар.
Надлежните треба да ги утврдат околностите и евентуалната кривична одговорност. Осомничениот треба да биде сослушан во законскиот рок на задржување.
