Грчкиот парламент го усвои законот со кој од 1 јануари 2027 година се воведува ограничување на пристапот до социјалните мрежи за деца помлади од 15 години. Законското решение беше изгласано по долга собраниска расправа, а го поддржа владејачката Нова демократија.
Министерот за дигитално управување Димитрис Папастергиу објасни дека платформите ќе мора да проверуваат дали корисниците ја исполнуваат возраста. За таа цел е предвидена употреба на системот Kids Wallet, кој треба да ја потврдува возрасната категорија без откривање дополнителни лични податоци.
Опозициските партии изразија несогласување со делови од решението, но законот го доби потребното парламентарно мнозинство.
