Силните дождови предизвикаа тешки поплави во јужниот дел на Франција, при што, според досегашните информации, загинале најмалку три лица. Регионалните власти соопштија дека водостојот на одредени локации достигнал рекордни нивоа, а голем број домаќинства останале без електрична енергија.
Во Лансон-Прованс биле пронајдени телата на две жени, на возраст од 86 и 26 години, кои настрадале во поплавен подрум. Трета жена, на возраст од 75 години, загинала во Сен-Митр-ле-Ремпар. Пријавено е и едно повредено лице.
Околу 250 жители на Арл и Сен-Мартен-де-Кро биле сместени во евакуациски центри. Невремето предизвикало значителна материјална штета, прекини во патниот и железничкиот сообраќај и проблеми со телефонските врски.
