Високиот комесар на Обединетите нации за човекови права, Фолкер Тирк, ги осуди насилствата што се случуваа за време на неодамнешните протести во Албанија, Франција, Италија, Белгија и Португалија. Тој повика на смирување на тензиите и нагласи дека граѓаните имаат право мирно да протестираат и да ги изразуваат своите барања.
Тирк предупреди и на извештаите за можна прекумерна употреба на сила од полициски службеници, вклучително и во случаи во кои биле погодени малолетници. Според него, сите такви наводи треба да бидат независно и ефикасно истражени, додека лицата што вршат насилство и уништуваат имот треба индивидуално да одговараат.
Реакцијата на ОН има особено значење за Албанија, каде што неколкудневните протести резултираа со голем број повредени. Пораката е насочена и кон властите и кон демонстрантите: правото на протест и заштитата на јавната безбедност мора да се остваруваат во рамките на законот.
