Евентуална копнена инвазија на САД врз Иран би завршила со воена катастрофа за Соединетите Американски Држави, бидејќи модерните технологии и стратегиите за исцрпување го прават присуството на копнени трупи во такви конфликти речиси невозможно.
Ова го оцени во статија за британскиот „Телеграф“ Валериј Залужни, поранешен врховен командант на украинските вооружени сили и моментално амбасадор на земјата во Обединетото Кралство.
Залужни повлече неколку паралели помеѓу војната во Украина и ескалацијата на конфликтите на Блискиот Исток. Тој тврди дека промените во борбените парадигми ги неутрализирале традиционалните предности на големите воени сили. Според него, отпорот на Украина докажува дека дури и помалите нации можат успешно да се соочат со помоќните агресори користејќи асиметрични тактики.
„Брзината со која се одвиваа минатите војни во регионот создаде многу илузии. Огромните промени на боиштата на руско-украинската војна ја променија парадигмата на војување, а со тоа и самата суштина на борбените способности на оние кои би сакале да ги тестираат“, напиша Залужни.
Искуството од Украина, вели Залужни, ја покажува ефикасноста на концептот на „зона на уништување“ во кој беспилотните летала вршат целосна контрола врз територијата. Доколку американските сили се обидат да слетаат, Иран веројатно ќе примени слична стратегија на исцрпување. Во такви услови, испраќањето војници во зоната на дејствување станува фатална стратешка грешка.
„Многу е опасно ако која било страна се обиде да тестира како функционира „зоната на уништување“ на пустински терен. Тоа ќе биде катастрофа“, нагласи генералот.
Залужни верува дека во моментов само три земји имаат реален капацитет да водат ваков вид модерна војна: Украина, Русија и Иран. Тој нагласи дека политичката волја и технолошката адаптација им овозможуваат на овие нации да одржуваат борбени способности што ги надминуваат нивните економски или демографски ресурси.
Неговото предупредување доаѓа во време кога САД и Иран разменуваат закани по ултиматумот на Доналд Трамп за Ормускиот теснец. Набљудувачите велат дека САД итно распоредуваат воени бродови со илјадници маринци во Персискиот Залив, зголемувајќи ги стравувањата од можна наредба за копнена офанзива.
Во исто време, администрацијата на Трамп отвори прелиминарни разговори за мировни преговори со Техеран по три недели регионално војување./Извор:Makfax
ПОПУЛАРНО НА ИНТЕРНЕТ...
