„Мајката и детето, во временскиот интервал пред да паднат од балконот, од внатрешната страна се заклучиле во станот, и според информациите со кои располагам, немало друго лице присутно во станот“, изјави министерот Панче Тошковски.
Според информациите кои го обелодени полицијата на 2 март, во 12:05 часот, во МВР била примена пријава за расправија меѓу сопружници.
Полицијаци пристигнале во зградата во Тафталиџе 1 по 15 минути и разговарале со жената, која подоцна изјавила дека немало физички контакт со сопругот и дека станувало збор за недоразбирање.
Инаку мажот на жената која вчера падна од зграда во Тафталиџе заедно со нејзината ќерка е уапсен.
„По усна наредба на јавен обвинител е уапсен сопругот, Стојанче Јовановски, под сомнение за сторување кривично дело. Тој се наоѓа во полициска станица, со него се работи, се обработува целокупната документација и против него ќе биде поднесена кривична пријава“, рече Панче Тошковски.
За насилникот инаку се воделе десетина кривични пријави по разни основи.
