Минималната плата во Македонија, која во март годинава достигна речиси 400 евра, веќе го губи својот реален ефект. Според најновите податоци, инфлацијата од 4 отсто значително ја поткопува куповната моќ на работниците, а владата засега не покажува волја за ново усогласување.
Иако мерката за зголемување на минималецот беше поздравена како чекор кон подобрување на животниот стандард, економистите предупредуваат дека без редовно прилагодување на растечките цени, секое зголемување останува краткорочно решение.
„Со ова темпо, минималната плата реално вреди многу помалку од на хартија. Работниците кои живеат со овие приходи се борат да ги покријат основните трошоци, а притисокот врз домашниот буџет расте од месец во месец“, велат познавачите на состојбите.
Најтешко погодени се семејствата со ниски приходи, за кои скокот на цените на храната, енергенсите и кириите е најголем удар. Тие бараат итни мерки и усогласување на минималецот со инфлацијата, а не само повремени зголемувања што брзо ја губат својата вредност.
Од владата, пак, стигнуваат пораки дека ново покачување засега не е на дневен ред, со образложение дека тоа би можело да создаде дополнителен товар за стопанството. Економските аналитичари предупредуваат дека ваквиот став ја продлабочува социјалната нееднаквост и го зголемува незадоволството кај работниците.
Додека институциите калкулираат со бројки и проценти, оние што ја земаат минималната плата секојдневно се соочуваат со реалноста: парите едноставно не стигаат.
ПОПУЛАРНО НА ИНТЕРНЕТ...
