Украинските власти денеска наредија евакуација на Купјанск, важен град и три други локалитети во североисточниот регион Харков, бидејќи руските сили се приближуваат кон клучниот град и властите се соочуваат со потешкотии во обезбедувањето резерви за населението во текот на зимата.
Покрај Купјанск, железнички центар лоциран на реката Оскил, евакуација беше наредена и за Борова на југ, во близина на градот Изијум, уште еден голем логистички центар.
Купјанск беше заземен од руските сили на почетокот на инвазијата во февруари 2022 година, но беше повторно преземен од украинските сили подоцна истата година.
Гувернерот на регионот Харков, Олех Синјехубов, на националната телевизија изјави дека евакуацијата е задолжителна. „Ситуацијата е најтешка во секторот Купјанск. На источниот брег на реката Оскил, која го дели градот, повеќе не можеме да гарантираме обновување на електричната енергија, греењето и снабдувањето со вода поради постојаното гранатирање“, рече тој. „Сите тимови за поправка веднаш се под руски оган“, додаде тој.
Руските сили се повеќе напредуваат во источниот украински регион Доњецк и се активни со месеци посеверно во регионот Харков, фокусирајќи се на Купјанск.
Харков, вториот по големина град во Украина, западно од Купјанск, беше под постојани ракетни и беспилотни напади во поголемиот дел од војната.
Генералштабот на украинската армија извести дека во изминатите 24 часа во близина на Купјанск се случиле 19 битки, а седум се уште се во тек./Извор:Makfax
