Претседателот на Владата, Димитар Ковачевски, утре и задутре, ќе учествува на четвртиот самит на Советот на Европа во Рејкјавик, Исланд.
Премиерот Ковачевски ќе присуствува на самитот на кој ќе земат учество претседатели на држави и влади на земји членки на Советот на Европа. Во рамките на самитот, утре, Ковачевски ќе учествува на тркалезна маса, на која ќе се разговара за моделите за зачувување и развој на демократијата во време на огромни ризици за неа, а на која ќе земат учество и претседателот на Европскиот совет, Шарл Мишел, како и премиерите на Грузија, Норвешка, Италија, како и претседатели и министри за надворешни работи на повеќе земји од Европа.
На 17 мај премиерот Ковачевски ќе има свое излагање на генералната дебата на Советот на Европа, која овој пат е на тема „Обединети за Европа“, а каде што се предвидени воедно и воведни обраќања на премиерката на Исланд, Јакобсдотир, генералната секретарка на Советот на Европа, Пејчиновиќ-Буриќ, како и претседателот на Парламентарно собрание на Советот на Европа, Тини Кокс.
Планирано е Ковачевски да разговора со повеќе европски лидери.
Во состав на делегацијата што ја предводи премиерот Ковачевски е и Бојан Маричиќ, заменик на претседателот на Владата задолжен за европски прашања.
НАЈЧИТАНО НА ИНТЕРНЕТ...
