11.8 C
Скопје
26. септември 2022
Centar.mk – Вести, бизнис, забава, спорт…
Македонија

Каевски: Да се истражи скандалот за тендерот од 136 милиони евра и улогата на Мицкоски

Во ВМРО-ДПМНЕ сами се фатија со рацете во медот за спорниот тендер од 136 милиони евра за пречистителната станица во Скопје, изјави на прес-конференција пратеникот и портпарол на СДСМ, Дарко Каевски.

„Градоначалничката, што ВМРО-ДПМНЕ ја поддржа, и поранешниот шеф на кабинетот на Христијан Мицкоски, Златко Перински, со денови меѓусебно се обвинуваа за спорниот тендер, за влијанија, за рацете во медот, за пари. А Мицкоски 10 дена молчи за својата улога во овој тендер, вреден 136 милиони евра. Надлежните институции веќе постапуваат по допрен глас“, рече Каевски.

Додаде дека скандалот за тендерот вреден 136 милиони евра мора до крај да се истражи и да се утврди улогата на Мицкоски.

„Јавноста знае дека токму Мицкоски ја промовира Арсовска, токму тој ја пречека во белиот дворец на денот пред изборите и токму тој во нејзино име преговараше за набавка на електрични автобуси. Мицкоски, кој на изборите во 2020 година беше шпицен кандидат за премиер, денес е шпицен градоначалник, кој се меша во работата на градоначалниците од ВМРО-ДПМНЕ. И сето тоа не поради граѓаните, туку за лични интереси и спас на фотелјата во ВМРО-ДПМНЕ. Криминални тендери, партизација, расипничко трошење на народните пари во време на криза, тоа ја одбележа првата година од мандатот на градоначалниците на ВМРО-ДПМНЕ“, истакна Каевски.

Како што потенцира, ниту во Скопје ниту во која било скопска општина раководена од ВМРО-ДПМНЕ досега нема реализирано ниту еден крупен и важен проекти за граѓаните. И не само што нема нови, туку прекинати се и веќе почнати проекти од претходните градоначалници, додаде Каевски.