Јавноста сведочи дека коалицискиот партнер на Христијан Мицкоски, политичкиот субјект Левица, отворено ја поддржува воената агресија врз Украина, изјави на прес-конференција пратеникот на СДСМ, Дарко Каевски, откако пратениците на оваа партија вчера гласаа против декларацијата за Украина во македонското Собрание.
СДСМ реагира дека Левицата ги нарекува граѓаните на Украина неонацисти и користат крајно несоодветен речник, идентичен со оној на агресорот.
„Ова се опасни ставови, кои се на штета на државниот и национален интерес на нашата татковина, на нејзините стратешки цели и спротивни на целиот демократски свет. Левицата е коалициски партнер на ВМРО-ДПМНЕ во Собранието. Заедно ги кочат и блокираат законите што се од интерес на граѓаните и државата. Левицата е коалициски партнер на Христијан Мицкоски и ВМРО-ДПМНЕ и на локално ниво во многу општини. Дури и во главниот град Скопје. Бидејќи станува збор за негов близок коалициски партнер, го прашуваме Христијан Мицкоски: Кој е неговиот став за поддржувањето на воената агресијата на Русија врз Украина од страна на Левицата? Затоа ли самиот Мицкоски ги оправдува сите што ја поддржуваат воената агресија во своите јавни настапи?“, праша Каевски.
