Самостојниот синдикат на новинари и медиумски работници вечерва ќе ја додели Годишната награда „Медиум промотор на новинарството како јавно добро – Роберто Беличанец“ за 2019 година.
Настанот ќе почне со панел-дискусија на тема „Како до медиуми кои го третираат новинарството како јавно добро?“, а по дискусијата ќе биде доделена наградата.
На панел-дискусијата ќе учествуваат: Билјана Бејкова, НВО Инфоцентар, Звездан Георгиевски, в.д. претседател на ССНМ, Билјана Секуловска, уредник НоваТв.мк и Тамара Чаусидис, уредник, БИРН Македонија/Призма.мк.
Самостојниот синдикат на новинари и медиумски работници во 2018 година ја воспостави годишната награда „Медиум промотор на новинарството како јавно добро“, која го носи името на прерано починатиот борец за слобода на изразување и експерт за медиуми – Роберто Беличанец.
Оваа награда ССНМ ја доделува во партнерство со Македонски институт за медиуми – МИМ / Macedonian Institute for Media – MIM, Институт за комуникациски студии и Media Diversity Institute од Лондон во рамките на проектот “Писменост за вести и дигитална писменост- Справување со лажните вести“, поддржан од Европската Унија.
