Зоолошката градина Скопје во 2020 година ќе стане дел од Европската асоцијација на зоолошките градини (ЕАЗА). Минатиот викенд во Шпанија, Валенсија, се одржа годишната конференција на асоцијацијата, каде што европските членки ја донеле одлуката за членството.
Директорот на Зоолошката градина, Ѓорѓи Галетановски, по тој повод изјави дека работат напорно бидејќи да се биде членка на асоцијацијата е голем престиж.
„Нам уште на почетокот цел ни беше што побргу да имаме европска зоолошка. Нашата делегација се врати со позитивна вест од Шпанија. Европските членки одлучиле во 2020 година скопската зоолошка да има скрининг и да биде првата од балканските зоолошки што ќе влезе во ЕАЗА. Посветено работиме на условите што ни ги поставува Европа. Носиме нови животни, реновираме живеалишта, работиме на безбедноста на постителите и животните. Моите очекувања беа до 2022 да успееме, но ако нè примат во 2020, тоа ќе биде голем успех и Скопје ќе има зоолошка под ѕвездата на Европа“, изјави директорот Галетановски.
