Опозициската ВМРО-ДПМНЕ преку соопштение тврди дека е видлива поврзаноста на премиерот Зоран Заев со осомничениот Бојан Јовановски и нивната координираност во собирањето рекет.
Втор пат по ред, велат од ВМРО-ДПМНЕ, се потврдува дека Зоран Заев бил во тек со сѐ.
„Улогата на Заев во криминалот станува јасна за целата јавност, освен за Вилма Русковска која се очекува повторно да негира дека бил споменат и да ги прикрива трагите што водат кон него. Зоран Заев од ден во ден сѐ повеќе тоне. Во Република Македонија единствено блескаат криминалот, рекетот и изневерените очекувања. Власта наместо да се бори против криминалот, го штити. 4 месеци се развлекува истрагата за случајот Рекет. ЈО ги затвори само директните извршители, а за главата на октоподот сѐ уште нема ни истрага“, нагласува опозициската партија.
ВМРО-ДПМНЕ додава дека бизнисмените се рекетирани, работниците се измачувани и наместо развој имаме само стагнација. Според ВМРО-ДПМНЕ, времето на оваа власт проаѓа и неопходно е одржување на предвремени избори.
