Почна исплатата на зголемената социјална помош согласно правата предвидени со новата социјална реформа. Министерката за труд и социјална политика, Мила Царовска, изјави дека денеска 25.794 домаќинства на нивните трансакциски сметки добија гарантиран минимален приход, којашто за поголемиот дел од нив е зголемена за 100%. На сите овие домаќинства коишто имаат деца дополнително им е исплатен и детски и образовен додаток. Аплицирањето за новите права е сè уште во тек и очекуваме овие бројки да продолжат со растат.
„Навистина ми е драго што спроведувањето на реформата се одвива непречено и нашите најранливи граѓани конечно ја добиваат помошта што им е потребна. Со овие промени ја намалуваме сиромаштијата во државата, овозможуваме еднаков старт за секое дете, ги унапредуваме правата на лицата со попреченост и го подобруваме квалитетот на предучилишното образование“, изјави министерката за труд и социјална политика, Мила Царовска.
Министерката Царовска, исто така го честиташе денешното одбележување на Денот на социјалните работници во Република Северна Македонија.
„Законите, прописите и актите се само зборови напишани на хартија, коишто ќе немаат никакво значење, ако не се преточат во функционален систем. Бескрајно сум благодарна, но и горда што во Центрите за социјална работа поседуваме квалитетен човечки капитал. Со заедничка посветеност градиме вистински праведно и хумано општество, создаваме услови за развој на нашата земја и подобар живот за сите наши граѓани и граѓанки“, рече Царовска.
Директорката на Центар за социјални работи на Град Скопје, Наташа Станојевиќ, којшто покрива најголем дел од корисниците во државата ги повика домаќинствата да поднесуваат барања за остварување на правото за родителските додатоци (додатоците за прво, второ и трето дете), како и за детскиот додаток.
