ЕУ ќе го изгуби влијанието на Западен Балкан и ќе ризикува зајакнување на руското и кинеското влијание ако не даде зелено светло за Северна Македонија за започнување на преговорите за пристапување во блокот, предупреди министерот за надворешни работи, Никола Димитров.
Во интервју за „Фајненшл тајмс“ тој рече дека Брисел треба да ја препознае успешната приказна и да ја награди.
Димитров порача дека ЕУ треба да направи разлика на Балканот и нагласи дека нашата земја создала атмосфера во која би било речиси срамно да не се постигне консензус за нејзиниот случај.
Димитров го спомена решавањето на отворените прашања и предупреди дека одбивањето од страна на ЕУ ќе го наруши кредибилитетот на владата во Скопје и ќе ги зајакне националистичките сили.
„Тоа ќе биде обесхрабрувачки и за оние кои се обидуваат да ги решат другите важни билатерални спорови со кои се соочува регионот по распадот на поранешна Југославија“, изјави Димитров за „Фајненшел тајмс“.
