4.8 C
Скопје
19. април 2024
Centar.mk – Вести, бизнис, забава, спорт…
СВЕТ

(Видео) Партизани со тенкови влегоа во Русија, се водат жестоки борби, објавени снимки

Борците на Легијата на слободата на Русија, рускиот волонтерски корпус и сибирскиот баталјон известија дека влегле на граничната територија на Русија. На социјалните мрежи се шират снимки од наводни борби, на кои се слушаат истрели и експлозии. Илја Пономарев, руски опозиционер и поранешен пратеник во државната Дума, ги потврди извештаите за жестоки борби.

Руските партизани тврдат дека ја презеле контролата врз пограничниот град Лозова Рудка во Белгородската област, а во моментот се водат борби во селото Теткино во областа Курск. „Ете, конечно, сме дома. Како што ветивме, во нашата руска земја носиме слобода и правда“, се вели во објавата на сибирскиот баталјон на каналот на „Телеграм“.

„Претходно, рековме дека нема да биде можно со мирни средства да се собори криминалниот диктаторски режим во Руската Федерација. Тој може да се елиминира само со оружје в рака. Почнавме да го исполнуваме нашето ветување. Продолжуваат жестоките борби на територијата на Руската Федерација“, додаваат тие.

Гувернерот на Курската област, Роман Старовојт, објави дека диверзантско-извидувачка група се обидела да навлезе во областа кај селото, но нападот бил одбиен. „Имаше обид да се пробие диверзантско-извидувачката група, се слушаше пукање, но пробив немаше“, рече тој.

Тој додаде дека украинските сили го гранатирале селото за време на партизанскиот упад, при што едно лице било рането. „За жал, има жртви. Повреден е локален жител, му била укажана потребната помош“, објави тој на „Телеграм“. Воздушната тревога сè уште е во сила во регионот Курск.

Рускиот воен блогер Вор Гонзо тврди дека вооружени групи во пикапи, поддржани од минофрлачки и артилериски оган, се обиделе да навлезат во Русија. Тој вели дека на приодот кон границата идентификувале неколку непријателски тенкови, кои отвориле оган при обидот за напад.

„Според моите информации, непријателот не успеал да ја пробие одбранбената линија или да постигне други опипливи тактички успеси. Борбите се во тек“, посочи тој.

Портпаролот на украинското воено разузнавање (ГУР), Андриј Јусов, истакна дека спорните единици се составени од руски државјани. „Тие дејствуваат на територијата на Руската Федерација целосно автономно, независно, исполнувајќи ги своите општествено-политички програмски задачи. Впрочем, ова не се први такви акции на овие структури и организации во таа област“, ​​рече тој.

Руските медиуми и руското Министерство за дигитален развој известуваат дека многубројни електронски услуги во регионот на Белгород во моментот се недостапни поради сајбер-напади. Легијата на слободата на Русија сподели видео, на кое наводно се гледа уништување руски оклопен транспортер во регионот Белгород.