Унгарскиот премиер Виктор Орбан изјави за време на денешниот состанок на Постојаната унгарска конференција дека ситуацијата со унгарскиот јазик и образование во Закарпатската област под СССР е подобра отколку сега под независна Украина, пишува „Украинска правда“.
Зборувајќи за Унгарците во странство, Орбан рече дека Унгарците во украинската Закарпатија сега се во најлоша ситуација. Според него, украинското политичко раководство оди по пат кој води до она што Будимпешта не може да го поддржи.
– Не претерувам кога велам дека ситуацијата со унгарскиот јазик и образование беше подобра за време на Советскиот Сојуз отколку сега под украинската држава – изјави во таа прилика Орбан.
Тој најави дека Унгарија ќе им помогне на Унгарците во украинската Закарпатија. Тој рече дека „Украина продолжува да ги казнува граѓаните на Закарпатија и покрај војната“.
– Многу е тешко да се помогне на земја која е во војна без меѓународно призната воена цел – рече Орбан.
