Американскиот претседател Џозеф Бајден изјави денеска за време на неговата посета на Ханој дека односите на САД со Виетнам влегле во нова фаза.
Говорејќи на бизнис-форум, Бајден рече дека двете нации ја продлабочуваат соработката на полето на информатичката технологија, полуспроводниците и вештачката интелигенција, објави „Ројтерс“. Бајден нагласи дека Виетнам е клучен за минералните резерви од исклучително значење.
Лидерите на водечките американски и виетнамски компании од областа на полуспроводниците, информатичките технологии и авијацијата денеска се сретнаа во рамките на посетата на Бајден на Ханој. Директори од „Гугл“, „Интел“, „Амкор“, „Марвел“, „Боинг“ и други присуствуваа на самитот за иновации и инвестиции меѓу САД и Виетнам.
Од виетнамска страна учествуваа менаџери на производителот на електрични автомобили „Винфаст“, авиокомпанијата „Виетнам релајнс“, технолошката компанија ФПТ, како и интернет-компанијата ВНГ.
Според процените на Американскиот геолошки институт, Виетнам е втората земја во светот по наоѓалишта на ретки минерали што се користат во производството на електрични возила и турбини на ветер.
Деловниот состанок следува по договорот за подобрување на дипломатските односи меѓу САД и Виетнам во неделата.
Американскиот државен секретар, Ентони Блинкен, и виетнамскиот министер за инвестиции, Нгуен Чи Дунг, одржаа средба по што следуваа разговори со Бајден и виетнамскиот премиер Фам Мин Чин.
