48-годишен маж, за кој се вели дека има грчко презиме, се приклучил на колоната на германскиот канцелар Олаф Шолц со приватен автомобил, а кога колоната стигнала до пистата на аеродромот во Франкфурт, тој успеал да стигне до канцеларот и да го зграпчи со рацете.
Како што пренесува „Билд“, инцидентот се случил во средата околу 23 часот, само неколку моменти пред Шолц да се качи во владиниот авион.
Канцеларот штотуку го прослави 25-тиот роденден на Европската централна банка (ЕЦБ) и ја напушти зградата на ЕЦБ со министерот за финансии, упатувајќи се кон аеродромот. Тие патуваа во блиндирани лимузини, а полицајците од покраината Хесен со патролни автомобили и мотоцикли го обезбедуваа владиниот конвој. Телохранителите на канцеларот седеа во двата службени автомобили на Шолц.
Попатно зад последното патролно возило одеднаш се појави приватен автомобил. На воланот бил човек за кој подоцна се тврди дека мислел оти се работи за голема семејна венчавка. Полицајците очигледно не го забележале автомобилот, кој не бил дел од владиниот конвој.
Чуварите на аеродромот во Франкфурт го пуштиле да ја помине бариерата на патот до пистата, иако регистарската табличка не била однапред објавена како сите други.
Конвојот потоа продолжил кон владиниот авион Ербас А319. Сите членови на делегацијата почнале да се качуваат во авионот. Само не Шолц.
Тој остварил уште еден телефонски повик во неговиот автомобил, кој траел неколку минути. Канцеларот сè уште го чувале телохранители и полиција.
Потоа Шолц излегол од лимузината сакајќи да и се заблагодари на полицијата и како што често се случува, да се фотографира за спомен.
Во тој момент мажот го напуштил возилото, одеднаш се упатил кон Шолц, се ракувал со него и го притиснал на градите. Дури кога човекот го ослободил Шолц, телохранителите ја препознале опасноста на ситуацијата.
Во тој момент сите сфатиле дека не знаат кој е човекот, па брзо бил уапсен.
Кабинетот на канцеларот објави дека „за Олаф Шолц тоа не бил голем инцидент во конкретната ситуација, само изненадувачки топла прегратка. Во ретроспектива, станува јасно што можело да се случи“.
Тимот за безбедност на Шолц е скршен и признава: Тоа никогаш повеќе не смее да се повтори. А канцеларот?
Тој реагираше прилично ладнокрвно, а потоа се сликаше со полицајците.
