Граѓаните на Анкара се шокираа кога видоа кауч како лета над нивните глави за време на силен ветер и бура што го зафати градот пред неколку дена.
Летечкото парче мебел излетало од балконот на стан на триесет и петтиот кат од станбен блок во турската престолнина.
На видеото кое се појави на социјалните мрежи се гледа како каучот лета, а откако помина извесно време во воздух падна меѓу две згради. За среќа никој не беше повреден во овој инцидент.
– Никој не беше повреден, но сите бевме исплашени – вели авторот на видеото.
Каучот наводно удрил во неколку згради во населбата пред да слета.
Сето ова се случи откако земјата ја зафати бран од силно невреме кое крена покриви и корнеше дрвја од земја.
Градоначалникот на Анкара ги предупреди своите сограѓани да бидат претпазливи кога има невреме.