Најмалку девет лица загинаа, а неколку се водат за исчезнати откога поројниот дожд го зафати северниот италијански регион Емилија-Ромања предизвикувајќи поплави и лизгање на земјиштето. Речиси 10.000 луѓе беа евакуирани, а некои граѓани мораа да бидат извлечени од покривите со хеликоптери.
Властите соопштија дека 14 реки се излеале од коритата поплавувајќи 23 града. Градоначалникот на Равена изјави дека неговиот град сега е непрепознатлив.
Трката за ГН на Формула 1 викендов во Имола, град блиску до многу од најтешко погодените области, беше откажана во обид да се намали притисокот врз службите за итни случаи и да се спречат љубителите на трката да се соберат во погодениот регион.
Италијанската крајбрежна стража објави видео како спасуваат двајца постари лица од покривот на потопена куќа.