Тинејџерка од Албукерки, Ново Мексико е осудена на 18 години затвор затоа што фрлила новороденче во контејнер зад трговски центар во јануари 2022 година, јавуваат медиумите во САД.
Минатата недела, поротата ја прогласи Алексис Авила за виновна за обид за убиство од прв степен и злоупотреба на деца што резултирало со голема телесна повреда.
Државниот окружен судија ја наведе загриженоста за менталното здравје и возраста на обвинетата кога суспендираше две години од казната.
Авила (19) го ставила своето новороденче во валкано ќебе или крпа пред да го фрли во контејнер на ниски надворешни температури. Според обвинителите, инцидентот бил снимен, а видео надзорот помогнал да се идентификува автомобилот што потоа ги довел до тинејџерката.
– Жал ми е што неговите први часови од животот беа трауматични и жалам што постојано ќе го има ова во главата и ќе мисли дека не го сакам, бидејќи тоа ќе го чита и слуша. Го сакам. Навистина го сакам – рекла Авила, пренесува АП.
Бебето живо го пронашле три лица кои копале во контејнерот. Трите лица, чии имиња не се објавени, велат дека слушнале плач и го нашле момчето со папочната врвца, како што пренесува АП.
Властите се сомневаат дека бебето било во ѓубрето шест часа и имало симптоми на хипотермија, објави АП во ноември 2022 година.
Авила, која имала 18 години во моментот на инцидентот, наводно го родила синот во бањата на член на семејството. Во кривичната пријава, Авила рекла дека не знаела дека е бремена се додека не отишла на лекар поради болки во стомакот на 6 јануари, според АП. Таа се породила следниот ден, според обвинението.
– Отидов во тоалет и тоа само излезе. Бев во паника и не знаев што да правам. Се плашев. Бев толку исплашена дека мајка ми ќе ме мрази – изјавила Авила во полицијата за време на испитувањето.
