Шефот на кинеската дипломатија Ванг Ји допатува во Москва за да разговара за можниот мировен план за Украина, објави денеска рускиот весник Комерсант.
Главната цел на оваа посета е да се зголеми улогата на Пекинг во договорот за Украина, пишува Комерсант.
На годишната Минхенска безбедносна конференција минатата недела, Ванг ги обвини Соединетите Држави за кршење на меѓународните норми со „хистерично“ однесување.
Тој повторно повика на дијалог и им предложи на европските земји „смирено да размислат“ за начините за завршување на војната. Ванг исто така рече дека има „некои сили кои очигледно не сакаат преговорите да успеат или војната наскоро да заврши“, но не прецизираше на кого се мисли.
Кинескиот лидер Кси Џинпинг, најави италијанскиот министер за надворешни работи минатата недела, треба да одржи „мировен говор“ на годишнината од инвазијата на Украина. Антонио Тајани изјави за РАИ Радио 1 дека ја искористил неговата средба во Рим со Ванг Ји во четвртокот за да побара од Пекинг да ја искористи својата моќ за да ја убеди Русија да стави крај на војната, истовремено гарантирајќи ја независноста на Украина.
– Ми кажа дека Кси ќе одржи мировен говор на годишнината од инвазијата на Украина – рече Тајани.
