Centar.mk – Вести, бизнис, забава, спорт…
Свет

ЕУ го менува законот поради недостигот на антибиотици

Европската Унија ќе го промени своето законодавство поради недостигот на лекови со кој се соочи при невообичаено рано ширење заразни болести, најави денеска во Европскиот парламент еврокомесарката за здравство, Стела Киријакидес.

Земјите од ЕУ се соочуваат со „нагло зголемување на побарувачката за лекови поради ширење респираторни инфекции, а фармацевтските индустрии немаат доволен производствен капацитет“, изјави Киријакидес на седницата на Европскиот парламент во Стразбур.

Недостиг на антибиотици во 26 земји

Европската агенција за лекови претходно објави дека 26 европски земји пријавиле недостиг на антибиотици.

Затоа, Киријакидес во дискусијата со европратениците најави дека Комисијата планира да претстави предлог за стратегија за обезбедување на производството на лекови во март. Стратегијата ќе вклучува предлог за ревидирање на законодавството за фармацевтски производи и други мерки за „брзо зголемување на производството“ и „сите пациенти може да ги добијат потребните лекови по пристапни цени“, рече комесарот на Европската комисија за здравство.

Меѓу мерките, предвидено е рано известување за недостиг и транспарентно информирање за состојбата на резервите на земјите членки.

Таа истакна и дека Комисијата активно води разговори со претставници од фармацевтската индустрија со цел да се зголеми производството на лекови.

Главак: Независноста од трети земји е прашање од прв ред

Киријакидес истакна дека ХЕРА, тело на ЕУ за здравствени кризи формирано за време на пандемијата на Ковид-19, може да набавува лекови и медицински материјали во име на земјите членки.

Во дебатата неколку европратеници предупредија дека преместувањето на производството на лекови во трети земји ја поткопува безбедноста на снабдувањето во ЕУ.

Европратеничката од ХДЗ, Сунчана Главак, рече дека „мора да ја видиме независноста од трети земји во однос на набавката на лекови како првокласно безбедносно прашање“.

Главак потсети и дека феноменот на недостиг на лекови не е нов, но дека е влошен поради пандемијата на Ковид-19 и војната во Украина.

„Ситуацијата беше многу лоша во текот на годините во сите земји и ги погоди сите видови лекови. Главната причина за тоа е глобализацијата на производството на лекови, во која разните фази на производство се поделени на повеќе локации во светот. Кина и Индија произведуваат помеѓу 60 и 80 проценти од светските активни фармацевтски состојки. Оваа концентрација на пазарот доаѓа со ризици, со кои итно треба да почнеме да управуваме, имајќи ја предвид идната перспектива. Потребна ни е конкретна законска регулатива“, рече Главак.

Сокол: Производството на клучни лекови мора да го вратиме во Европа

Нејзиниот партиски колега Томислав Сокол, известувачот на Европскиот парламент за Регулативата за европската област за здравствени податоци, посочи и дека производството на клучните лекови треба да се врати во Европа.

„Преку таргетирана индустриска политика мораме да го вратиме во Европа производството на клучните лекови, како што се антибиотиците, чиј недостиг е сè поголем проблем бидејќи нивното производство денес, едноставно, е неисплатливо. Потребни ни се многу посилни стимулации и поддршка за производство на лекови во ЕУ отколку што имаме сега. Заштитата на здравјето на европските граѓани не смее да зависи од трети земји, како што е случај денес“, рече тој.