Проектил од украинскиот ракетен систем „С-300“ падна на територијата на Белорусија, во близина на градот Иваново, во областа Брест, соопшти денеска Министерството за одбрана.
Агенцијата „Белта“ претходно објави дека ракета на украинскиот систем паднала во периодот од 10 до 11 часот по локално време на територијата на Белорусија.
Како што наведува агенцијата во извештајот, за инцидентот веднаш бил информиран претседателот на Белорусија, Александар Лукашенко, а според негова наредба, тим вработени во Истражниот комитет и Министерството за одбрана работат на утврдување на причината за падот на ракетата.
„Белта“ пренесува дека се разгледуваат две верзии за инцидентот – проектилот влегол во воздушниот простор на Белорусија, како што беше случајот со неодамнешниот инцидент во Полска кога проектилот летал во погрешна насока, или проектилот бил соборен од белоруската воздушна одбрана.
На самото место работат вештаци од Истражниот комитет и од Министерството за одбрана. Нема информации за можни жртви или материјална штета, наведува белоруската агенција.
