Хрватската полиција ги расветли околностите за претепувањето на млад човек облечен како Дедо Мраз синоќа во Славонски Брод. Уапсени се неколку лица, меѓу кои и припадник на хрватската армија.
Младиот човек кој бил облечен како Дедо Мраз се здобил со тешки физички повреди и по укажаната лекарска помош бил пуштен дома.
Таткото на претепаниот Дедо Мраз изјави за ХРТ што се случило, според неговата верзија.
– Не можам да спијам како родител, плачам, жена ми плаче – вели Златко Ереиз од Славонски Брод.
– Од учтивост, на девојчињата им подари бонбони, на момчињата кондоми, на шега. Тоа е траума за секој родител и дете. Тешко е да се доживее. Сочувствувам со сите родители кои претрпеа такво нешто. Немам контакт со напаѓачот и не сакам да имам. Не сакам да го осудувам, има судство што ќе си ја заврши работата – рече таткото.
Претепаниот млад човек вели дека му е жал.
– Не е важно што направив, отиде во вода, нема да се повтори и тоа е тоа – вели Кристијан Ереиз.
– Жал ми е за се што се случи и не знам што друго да кажам. Не би сакал да се повтори. Навистина не се чувствувам најдобро и тоа е тоа – додаде тој.
Да потсетиме, на социјалните мрежи вчера се прошири видео од бруталното претепување на млад човек облечен како Дедо Мраз во Славонски Брод. Од полицијата потврдија дека нешто по 15 часот добиле дојава за тепачка меѓу неколку лица.
На видеото од тепачката се гледа како млад човек облечен како Дедо Мраз лежи на патот. Кога младиот човек се обидел да стане, му пришол друг млад човек и силно го удрил со нога во главата. После тоа, удрениот млад човек паѓа во несвест на асфалтот.
Младиот човек кој го шутна младото момче облечен како Дедо Мраз е припадник на хрватската војска. Министерството за одбрана вчера го осуди инцидентот и побара од Воената полиција да спроведе истрага.
Како што неофицијално дознава ХРТ, напаѓачот пред две години веќе бил дисциплински и кривично одговорен за нанесување телесни повреди и смртна закана. Не го избркаа од војска, но во меѓувреме напредуваше и добиваше награди.
