САД не ја охрабруваат Украина да спроведува операции на руска територија, изјави координаторот за стратешки комуникации во Советот за национална безбедност на Белата куќа Џон Кирби во интервју за „АБЦ“, пренесува Спутник.
– Се разбира, ние не ги охрабруваме ниту помагаме украинските операции внатре во Русија. Се обидуваме да обезбедиме (украинската страна) да може да ја заштити својата територија, да ја врати својата земја, меѓу другото, изгубена за време на вооружениот конфликт – рече Кирби.
Тој додаде дека ескалацијата на воениот конфликт во Украина не одговара на американските интереси.
– Од самиот почеток разговаравме за мониторинг и ги земавме предвид ризиците од ескалација на воените операции, бидејќи тоа е лошо не само за украинското население, туку и за нашите интереси, посочи Кирби.
Тој додаде дека ескалацијата на конфликтот исто така не одговара на интересите на населението на Русија.
Како што претходно соопшти Министерството за одбрана на Русија, Украина на 5 декември со беспилотни летала од советско производство ги нападна руските воени аеродроми „Дијагилево“ во Рјазанската област и „Енгелс“ во регионот Саратов.
Руската воздушна одбрана ги пресретна овие беспилотни летала кои летаа на мала височина. Според Министерството, при падот и експлозијата на фрагменти од беспилотни летала на аеродромите, лесно се оштетени трупот на два авиони.
Тројца руски војници загинаа во нападот на аеродромот, а уште четворица беа ранети и хоспитализирани.
