Официјални лица од администрацијата на Бајден проценуваат дека рускиот претседател Владимир Путин би можел да употреби хемиско оружје во Украина доколку руските војници продолжат да губат територии во Украина.
Тие потврдија дека администрацијата на Бајден се обидува да се подготви за ваков настан преку инвестиции во производство на системи за брзо откривање на хемиски напад, пишува „Политико“.
Тие тврдат дека немаат разузнавачки информации кои сугерираат дека е неизбежен хемиски напад. Напротив, многу претставници на Министерството за одбрана очекуваат дека борбите ќе престанат во текот на зимските месеци, а ниту една од конфликтните страни нема да може да заземе многу терен.
Меѓутоа, во случај на континуирани загуби на бојното поле или целосен колапс на руската војска, некои високи функционери веруваат дека Москва би можела да прибегне кон употреба на хемиско оружје, вклучително и она што беше употребено во труењето на Алексеј Навални.
Неименуваниот функционер тврди дека таков напад би можел да вклучува хемикалии кои лесно се сокриваат, што ќе им отежне на западните земји да ја докажат руската вина.
Експертите се убедени дека Русите би можеле да користат хемикалии во напад со масовни жртви, иако е познато дека Москва го користи нервниот агенс „новичок“ против едно или две лица истовремено.
Тие ја истакнуваат можноста некои хемикалии да се претворат во аеросол или да се користат во муниција за да им наштети на голема група луѓе.
Советот за национална безбедност одби да ги коментира шпекулациите за потенцијален хемиски напад.
Американците се свесни за фактот дека Русија инвестира значителни ресурси за да ги зајакне капацитетите на своето хемиско оружје.
Сенаторите беа информирани оваа есен за руските резерви на хемиско оружје и заканите во Украина.
Песимистичките предвидувања ја принудија администрацијата на Бајден да го подобри откривањето и подготовката за потенцијален хемиски напад.
Официјален претставник на Министерството за одбрана потврди дека Пентагон испрати тимови во источноевропските земји оваа есен за да ги освежат нивните вооружени сили за процедурите во случај на хемиска или биолошка закана.
Дополнително, САД му обезбедија на Киев хемиска, биолошка и нуклеарна одбранбена опрема како дел од пакетот за безбедносна помош вреден милијарди долари.
Високите функционери поддржуваат промена во американскиот пристап за подготовка и одговор на потенцијалните напади со хемиско оружје од различни актери, вклучително и Русија
