Американскиот претседател Џо Бајден во неделата, реагирајќи на пукањето во кое беа убиени најмалку пет лица во ЛГБТК клуб во Колорадо, рече дека омразата не може и не смее да се толерира.
– Не можеме и не смееме да толерираме омраза. Во моментов нема јасен мотив за овој напад, но знаеме дека ЛГБТКИ+ заедницата е цел на ужасно насилство исполнето со омраза во последните години – рече Бајден.
Тој рече дека претходно оваа година го потпишал „најзначајниот закон за безбедност на оружјето во речиси три децении“.
– Но, мораме да направиме повеќе. Треба да донесеме забрана за јуришно оружје за да го извадиме военото оружје од улиците на Америка – рече Бајден.
Пет лица загинаа, а 18 се повредени во пукотницата во саботата во геј клуб во Колорадо Спрингс, во американската сојузна држава Колорадо.
Осомничениот е во притвор, изјави за новинарите полициската службеничка Памела Кастро.
Club Q, како што се рекламира на Google, е „ноќен клуб за возрасни хомосексуалци и лезбејки со тематски ноќи, вклучувајќи караоке, драг-шоу и диџеј-забави“.
Полицијата дознала за пукањето нешто пред полноќ, изјави Кастро, но не даде никакви информации за можниот мотив за нападот.
Клубот објави дека е „уништен од безумниот напад врз нивната заедница“ и дека „напаѓачот бил поразен и запрен во неговата кампања на омраза благодарение на брзата и херојска реакција на нашите гости“.
