Руски воен авион „иљушин ИЛ-76“ слета на аеродромот во Техеран во раните утрински часови на 20 август носејќи 140 милиони евра, британска противтенковска ракета (NLAW), американска противтенковска ракета „Јавелин“ и противвоздушен проектил „Стингер“, изјави извор за „Скај њуз“ откривајќи воена тајна под услов да остане анонимен.
Добивај вести на вибер
Изворот тврди дека Русите за таа пратка добиле дронови од Иран.
Оружјето било дел од пратката со британска и американска воена опрема, првично наменета за украинската армија, која потоа „паднала во руски раце“, открива изворот. Тој исто така наведува дека оваа пратка може да им овозможи на Иранците да ја проучуваат западната технологија и потоа да ја копираат.
Нудејќи докази за наводна трансакција на 20 август, во која Русите за воениот плен добиле беспилотни летала од Иранците, изворот сподели со „Скај њуз“ сателитски снимки за кои тврди дека покажуваат два руски воени товарни авиона на аеродромот во Техеран.
На првата снимка направена во 1.17 часот на 20 август, на аеродромот „Мехрабад“ во главниот град на Иран, се гледаат два авиона. На другата, направена веднаш по 3.30 часот, едниот авион се движел по пистата, а другиот свртел. На последната снимка од серијата изгледа како и двата авиона да исчезнале. Еден или двата авиона отишле во Русија со ирански беспилотни летала, тврди изворот.
Изворот исто така вели дека знае за најмалку пет руски авиони што превезувале беспилотни летала од Иран од 20 август како дел од размената.
Исто така, се наведува како Иран испорачал вкупно 100 беспилотни летала Shahed-136, 60 помали беспилотни летала Shahed-131 и шест беспилотни летала „Мохаџер-6“ во Русија. За разлика од „самоубиствениот“ дрон „Шахед“, „Мохаџер-6“ е вооружен дрон, кој може да лансира муниција.
Москва минатиот месец соопшти дека нејзините сили користеле ирански беспилотни летала за да ја нападнат Украина.
Изворот наведува и дека во изминатите неколку дена Техеран и Москва направиле нов договор за беспилотни летала вреден 200 милиони евра.
