Кинескиот град Шангај почна да ја користи првата инхалирана вакцина против Ковид-19.
Администрацијата на Шангај објави дека вакцината за вдишување се нуди бесплатно како дополнителна доза на претходно вакцинирани лица. Целта на развојот на овие вакцини е да се вакцинираат лицата кои имаат проблем со класичната вакцинација поради употребата на игли, како и да се зголеми бројот на вакцинирани лица во сиромашните земји поради полесна администрација.
Кинеските регулатори ја одобрија употребата на овие вакцини како засилувачка доза во септември.
Развиена е од кинеската биофармацевтска компанија Cansino Biologics Inc. Компанијата објави дека клиничките испитувања се спроведени во Кина, Унгарија, Пакистан, Малезија, Аргентина и Мексико.
Според податоците на Светската здравствена организација (СЗО), во моментов низ светот се тестираат десетина вакцини кои ќе се вдишуваат преку нос.
