Предолго, просперитетот на ЕУ зависи од Кина и Русија, додека безбедноста е препуштена на САД, рече високиот дипломат на ЕУ, Жозеп Борел.
Оваа изјава дојде во време на скок на цените на енергенсите и обиди за ограничување на руската нафта и гас како дел од санкциите поради конфликтот во Украина, пишува Раша тудеј.
„ Нашиот просперитет се заснова на евтини извори на енергија кои доаѓаат од Русија. Рускиот гас – евтин и наводно достапен, безбеден и стабилен. Докажано е дека тоа не е така“, рече Борел во говорот на конференцијата на амбасадорите на ЕУ.
Тој додаде дека 27-члениот блок исто така премногу се потпира на трговијата со Кина, како и на кинеските инвестиции и „евтината стока“.
„ Мислам дека кинеските работници со нивните ниски плати направија многу подобро и многу повеќе за да ја зауздаат инфлацијата отколку сите централни банки заедно“, тврди Борел.
„ Значи, нашиот просперитет се базираше на Кина и Русија – енергијата и пазарот. Јасно е дека денес мораме да најдеме нови начини за енергија од рамките на Европската унија, колку што можеме, бидејќи не треба да менуваме една зависност за друга“.
Тој додаде дека, иако економски се повеќе зависни од Москва и Пекинг, „својата безбедност ја делегиравме на САД“. Претераното потпирање на Вашингтон, создава чувство на неизвесност во Брисел, особено ако следното американско раководство е помалку наклонето на ЕУ.
